Breaking News
Home / Sports / معروف کرکٹر شاہد آفریدی نے افغانستان کرکٹ لیگ کھیلنے کا فیصلہ کرلیا

معروف کرکٹر شاہد آفریدی نے افغانستان کرکٹ لیگ کھیلنے کا فیصلہ کرلیا

کراچی: معروف کرکٹر شاہد آفریدی نے افغانستان کرکٹ لیگ کھیلنے کا فیصلہ کرلیا، وہ جلد افغانستان روانہ ہوں گے۔

تفصیلات کے مطابق دنیائے کرکٹ کے مایہ ناز آل راونڈر شاہد خان آفریدی انگلش ٹی ٹوئنٹی سیزن سے فراغت کے بعد افغانستان کی ’’اسپاغیزا کرکٹ لیگ ‘‘میں شرکت کا ارادہ رکھتے ہیں۔
ذرائع کے مطابق بوم بوم آفریدی نے اس ضمن میں سیکیورٹی کلیئرنس کے لیے درخواست جمع کرادی ہے۔
خیال رہے کہ 11 ستمبر سے افغانستان کے دارالحکومت کابل میں شروع ہونے والی اسپاغیزا کرکٹ لیگ میں 6 فرنچائز کی ٹیموں کے مابین مقابلے ہوں گے ، ہر ٹیم نے افغان کرکٹرز سمیت بین الاقوامی کرکٹرز کی بھی خدمات حاصل کی ہیں اور اسپنگار ٹائیگرز نے بطور بین الاقوامی کرکٹر شاہد آفریدی کے ساتھ معاہدہ کیا ہے۔
دوسری جانب یہ اطلاعات بھی موصول ہوئی ہیں کہ افغانستان کے صدر اشرف غنی بھی شاہد آفریدی کے مداحوں میں شامل ہیں اور انھوں نے پسندیدہ کھلاڑی سے ملنے کے لیے رابطہ کیا ہے، اگر ممکنہ ملاقات ہوئی تو شاہد آفریدی دو طرفہ کرکٹ کی بحالی پر بھی تبادلہ خیال کریں گے۔
چیئرمین پاکستان کرکٹ بورڈ نجم سیٹھی نے بھی دو روز قبل شاہد آفریدی سے ٹیلی فونک رابطہ کیا تھا اور گفتگو کے دوران نجم سیٹھی نے 14 ستمبر کے پروگرام کے لیے آفریدی کو مدعو کیا ہے لیکن افغانستان لیگ میں ممکنہ شرکت کے باعث عارضی طور پر انھوں نے معذرت کرلی ہے۔
یہ بات بھی پیش نظر رہے کہ قومی ٹی ٹوئنٹی ٹیم کے سابق کپتان انگلش سیزن میں ہمشائر کاونٹی کلب کی نمائندگی کررہے ہیں اور ان کی ٹیم مایہ ناز آل راؤنڈر کی شاندار سنچری کی بدولت سیمی فائنل میں جگہ بنا چکی ہے۔
شاہد آفریدی کچھ روز کراچی میں اہل خانہ کے ساتھ وقت گزارنے کے بعد دوبارہ برطانیہ روانہ ہوجائیں گے او ر اس مرتبہ عیدقرباں وہیں گزارنے کا ارادہ رکھتے ہیں۔

Check Also

اگلی بارکراچی میں بین الاقوامی میچ ضرور ہوگا، مئیر کراچی وسیم اختر

اگلی بار کراچی میں بین الاقوامی میچ ضرور ہوگا، مئیر کراچی وسیم اختر

کراچی: مئیر کراچی وسیم اخترنے دعوی کیاہےکہ اگلی بارکراچی میں بین الاقوامی میچ ضرور ہوگا۔ …

Translate »